Eblas aŭskulti ĉi tiun artikolon, kiun voĉlegis Derek Roff.
La franca urbo Tuluzo (Toulouse) estas tre antikva. Sed samtempe ĝi estas urbo tute jun-kora pro la granda nombro de junuloj, kiuj studas ĉe ĝiaj tri grandaj universitatoj. Ĝia kromnomo estas “la roz-kolora urbo”, ĉar multaj konstruaĵoj estas konstruitaj el rozkoloraj brikoj.
Arno estas membro de la Esperanto-Kulturcentro (EKC) en Tuluzo. Ĉe la urbodomo de Tuluzo li atendas la komencon de la hodiaŭa bicikla ekskurso. La ekskurson organizis volontulo, Frico, kiu faras sian civilan servon ĉe EKC. Kun kelkaj minutoj da malfruo Frico alvenas, ĉar la aer-tubo de lia biciklo malpleniĝis.
Foj-foje tiaj aferoj ja okazas ĉe la Esperanto-Kulturcentro, kiam la kvar civil-servaj volontuloj organizas eventon en la rozkolora urbo. La Kulturcentro estis fondita en 1992 de lokaj anarkiistoj, kaj ĝi vivigas la lingvon Esperanto en kaj ĉirkaŭ Tuluzo.
Kiajn eventojn organizas EKC? Por homoj, kiuj ŝatas aŭskulti, estas Radio Elsendo ĉe 92.2 Canalsud; por homoj, kiuj ŝatas babili, estas lingvokafejo kaj ĉiumonata manĝo; kaj por homoj, kiuj ŝatas bicikli, estas biciklaj ekskursoj.
Ĉar la eventoj estas organizataj de la volontuloj, povas okazi, ke ne ĉio funkcias perfekte. Povas okazi, ke oni ekridas dum radio-elsendo pro fuŝa elparolo, povas okazi ke la manĝo malfruiĝas ĉar oni tro longe diskutis dum la antaŭa kunsido, kaj povas okazi ke la organizanto de biciklo-ekskurso alvenas kun malplena aertubo kaj devas peti helpon por lu-preni publikan biciklon.
Tamen la asocio havas historion de aktiva kunlaboro kun aliaj asocioj. Inter tiuj estas la muzik-eldonejo Vinilkosmo kaj la ekologia vilaĝo Saint Camelle. EKC kunlaboras ankaŭ kun diversaj eksterlandaj Esperantaj organizaĵoj ekzemple en Bjalistoko, Pollando, kie la volontuloj faras duonon de sia civila servo.
EKC ĉiam okazigas, unu fojon jare, la Semajnon de Esperanto (SemEO). Dum tiu semajno okazas aparte multaj eventoj, ekzemple teatraĵoj, koncertoj, kaj lingvo-kursoj.
Frédéric Düe
-
4
-
1
Frédéric Leon Düe (Frico) estas esperantisto el Berlino, Germanujo. Li estas volontulo ĉe EKC por la franca civila servo. Li lernis Esperanton en 2021 kaj provis krei Esperanto-klubon instruante la lingvon en Ruando en 2022/23. Li iam kunlaboris kun Asocio Nova Familio en Goma, DR Kongo. Li verkas Esperantan muzikon, kaj organizis kelkajn biciklo-ekskursojn por BEMI (Biciklista Esperantista Movado Internacia).
- aer-tubo: aer-plena ringo ĉirkaŭ la rado de biciklo, interne de la ekstera kovraĵo de la rado.
Wikimedia / Fanny Schertzer CC BY-SA 3.0
- anarkiisto: proponanto de socia kaj politika sistemo, kiu kontraŭas ĉian ŝtatan regadon, kaj proponas memregatan socion surbaze de libervola kunlaborado.
- antikva: malnovega.
- briko: malmola aĵo kun regula formo uzata por konstrui murojn, domojn kaj aliajn konstruaĵojn.
- civila servo: utila socia servo, kiun junulo povas fari anstataŭ la deviga soldat-servo.
- ekologia: respektanta la rilatojn de vivantaj estaĵoj inter si kaj kun sia medio.
- el-donejo: komerca organizaĵo, kiu produktas librojn kaj aliajn verkojn, kaj aranĝas ilian vendadon.
- el-sendo: programo dissendata per radio, televido aŭ Interreto.
- evento: aparta, sufiĉe grava okazaĵo.
- koncerto: muzika prezento.
- krom-nomo: plia nomo aldonita al la normala nomo de iu loko, kun la celo priskribi la apartaĵon de tiu loko.
- kun-laboro: kuna laborado pri iu komuna projekto.
- kun-sido: kunveno, kiam grupo de homoj, ekzemple membroj de asocio aŭ komerca organizaĵo, renkontiĝas por diskutadi kaj por fari proponojn aŭ decidojn.
- lu-preni: ricevi ion por sia propra uzo dum difinita tempo kontraŭ pago.
- volontulo: homo, kiu proponas sin por plenumi taskon aŭ fari laboron, plej ofte sen-page.
Rekomendataj komentoj
Aliĝu al la diskutado!
Eblas afiŝi nun kaj registriĝi poste. Se vi jam havas konton, ensalutu nun por afiŝi uzante ĝin.