Eblas aŭskulti ĉi tiun artikolon, kiun voĉlegis Simone Schumacher, Rafa Nogueras, Derek Roff.
Estis agrable pasigi vesperon kun Stefano. Li havis malhelajn buklajn harojn, profunde verdajn okulojn, kaj perfektan rideton. Li estis bona kunparolanto, ĉiam preta diskuti politikon, religion, aŭ laboron. Kaj ni parolis pri multaj aferoj. Ĉio estis perfekta ĝis la manĝo alvenis.
Li manĝis fiŝaĵon kaj brokolon, dum li kuntiris la brovojn pro mia hamburgero.
Mi preferis ne aŭskulti lian komenton, kiam mi petis plian bieron.
Kiam la kelnero alportis la menuon de desertoj, Stefano diris: “Ni ne manĝos deserton.”
Ĉu ni?
Al la apuda tablo, la kelnerino alportis grandan pecon da ĉokolada kuko. Tri tavolojn ĝi havis. Ankaŭ riĉan glazuron. La viro sidis sola. Li pretigis sin por manĝi. Mi fiksrigardis lin. Niaj rigardoj renkontiĝis.
“Ĉu gustumeton?” Rideteto. Lia forko moviĝis miadirekten.
Mi kapjesis.
“Se vi deziras ĝin, kara, venu preni.”
Kiel bedaŭrinde, Stefano. Vi ne ricevos deserton.
Myrtis Smith
-
4
-
3
Myrtis Smith estas usona esperantistino, inĝeniera instruisto, kaj regula kontribuanto al uea.facila. Ŝi amas ĉokoladajn kukojn.
- brokolo: verda legomo kun flora kapo.
- brovo: linio de haroj super la okulo.
- buklo: har-volvaĵo.
- ĉokolado: tre bongusta dolĉaĵo, plej ofte brun-kolora.
- deserto: dolĉa manĝaĵo aŭ fruktoj manĝataj kiel la lasta parto de manĝo.
- glazuro: dolĉa kovraĵo sur kuko el sukero miksita kun akvo, lakto aŭ simile.
- hamburgero: populara manĝaĵo, konsistanta el rondforma bovaĵtranĉaĵo inter du panoj.
- kelnero: servisto en manĝejo, kiu alportas manĝaĵojn aŭ trinkaĵojn.
- menuo: listo de manĝaĵoj en manĝejo.
- tavolo: larĝa, maldika kvanto de iu materialo kuŝanta sur alia simila.
Foto: Wikipedia/travelwayoflife CC BY-SA 2.0
Rekomendataj komentoj
Aliĝu al la diskutado!
Eblas afiŝi nun kaj registriĝi poste. Se vi jam havas konton, ensalutu nun por afiŝi uzante ĝin.