Eblas aŭskulti ĉi tiun artikolon, kiun voĉlegis Derek Roff.
En multaj landoj ekzistas Esperanto-kluboj. En iuj landoj ekzistas naciaj Esperanto-centroj. La plej granda Esperanto-centro en Francujo nomiĝas Kastelo Greziljono, france "château de Grésillon". Ĝin posedas ĉirkaŭ ducent kvindek esperantistoj el la tuta mondo, kadre de kooperativa societo kun la nomo "Kultur-domo de Esperanto".
En ĝi okazas Esperanto-staĝoj kun kursoj kaj aliaj aktivaĵoj, precipe dum la francaj lernejaj ferioj en aprilo, julio kaj aŭgusto, kaj ankaŭ en oktobro. Dum la tuta somero 2024, preskaŭ ducent homoj restadis en kastelo Greziljono, iuj dum kelkaj tagoj, aliaj dum tuta monato. Ili venis por lerni aŭ praktiki Esperanton, por ĝui verdan esperantistan etoson kaj por admiri la kastelon, kiu staras meze de vasta parko.
Jen mia raporto pri la someraj staĝoj en la jaro 2024:
• Komence de julio okazis nia 5-a Verda Naturisma Semajno kun la asocio INOE (Internacia Naturista Organizo Esperantista). Naturismo estas movado de homoj, kiuj sen vestoj ĝuas la naturon. Antaŭtagmeze oni studis Esperanton en du kursoj, kaj posttagmeze okazis sportaj aranĝoj, promenado, turismaj vizitoj, prelegoj, muziko kaj ludoj. Laŭ la vetero kaj la programo, la ĉeestantoj vestis sin pli aŭ malpli libere.
• Meze de julio dum dek tagoj okazis nia 8-a Maratona Esperanto-kursaro kun tri famaj instruistoj. Samtempe okazis la 36-a Internacia Esperanto-Konferenco kun dek ok prelegoj pri diversaj temoj. Krom intensa studado kaj praktikado de nia lingvo okazis ĉiutage ekskurso al lokaj vidindaĵoj. Ĉu vi volus mem iam studi en Greziljono – aŭ eble eĉ instrui tie?
• Komence de aŭgusto okazis nia 14-a Festa Semajno por infanoj kaj familioj kaj samtempe nia 3-a renkontiĝo SOMERAS. Du homoj instruis Esperanton, dum aliaj uzis la lingvon laŭ praktika maniero por prezenti dancadon, kantadon, familian terapion, japanan paper-faldadon, kaj kurson de japana abako.
• Fine de aŭgusto, esperantisto festis sian naskiĝtagon dum tuta semajno en nia kastelo, invitinte siajn malnovajn esperantistajn amikojn. Ankaŭ vi mem povus organizi similan eventon en nia kastelo.
• La sekva renkontiĝo, AŬTUNAS, atendas vin fine de oktobro kun kursoj kaj ekzamenoj, kun ĥora kantado, japana paperfaldado, kaj uzado de japana abako. Vidu informojn pri la aranĝo en la retpaĝo de Kastelo Greziljono.
Bert Schumann
-
2
Bert Schumann estas german-franca esperantisto, naskiĝinta en la iama GDR kaj loĝanta en Bretonujo, okcidenta Francujo, iom proksime al Greziljono. Li edziĝis kun franca esperantistino. Iliaj gefiloj parolas denaske la francan, la germanan kaj Esperanton. Kun siaj gefiloj li ĉeestis ĉiujn infankongresetojn de UEA de 2001 ĝis 2011, kaj mem organizis ilin ĝis 2022. En Greziljono, li aktivas ekde 2003 ĝis nun.
- abako: tradicia mana kalkulilo.
- admiri: opinii, ke io aŭ iu estas pli ol normale bona aŭ bela.
- ĉe-estanto: homo, kiu estas tie en la loko, kie io okazas.
- etoso: ĝenerala sento, kiun la ĉirkaŭaĵo prezentas al la ĉeestantoj.
- evento: aparta, sufiĉe grava okazaĵo.
- faldi: meti unu flankon de papero aŭ tuko sur la alian flankon, tiel ke unu flanko kuŝu sur la alia.
- ĥoro: grupo da homoj, kiuj kantas kune unu-sone aŭ plur-voĉe; grupo de homoj, kiuj kantas aŭ parolas ĉiuj kune.
- intensa (kurso): kurso, kiu okazas seninterrompe dum kelkaj tagoj por atingi altan nivelon tre rapide.
- kastelo: granda loĝloko, defendebla kontraŭ atakoj per altaj muroj; granda konstruaĵo kie loĝas reĝo aŭ alia grava persono.
Foto: Wikipedia / WyrdLight.com CC BY-SA 3.0
- konferenco: renkontiĝo de fakuloj, kiuj diskutas gravajn aferojn rilate al sia fako.
- kooperativo: asocio por komerca aŭ aliaj sociaj celoj, posedata de la membroj, kiuj interhelpas unu la alian.
- maratono: tre longdistanca kurado, kutime je 42,2 km; longedaŭra kaj postula sperto.
- societo: grupo de homoj, kiuj regule renkontiĝas kun komuna celo.
- staĝo: periodo de lernado dum kelkaj tagoj aŭ monatoj, cele al pretigo por nova laboro aŭ por ekhavi novan kapablon.
- terapio: metodo por kuraci korpan malsanon; traktado de mensa problemo per komunikado kaj interagado.
Rekomendataj komentoj
Ne estas komentoj por montri.
Aliĝu al la diskutado!
Eblas afiŝi nun kaj registriĝi poste. Se vi jam havas konton, ensalutu nun por afiŝi uzante ĝin.