Virtuala karavano

Katalin Kováts estas fondinto kaj redaktoro de edukado.net,  grava retejo por Esperanto-instruistoj. Kun kelkaj esperantistoj en somero 2019 Katalin partoprenis la plej grandan amas-marŝadon de la mondo, paŝante 140 kilometrojn en kvar tagoj. Samtempe ŝi reklamis kaj instruis Esperanton inter la 38 mil kunpaŝantoj.

Poste ŝi iniciatis novan projekton Kunpaŝado. Per tiu projekto ŝi celas krei komunumon, por kies membroj gravas la sana vivo kaj la kunagado. 

La kunpaŝantoj celas regule sportumi, ĉefe paŝadi. Farante tion, ili samtempe ĉirkaŭiras la mondon kune, en virtuala karavano. Ili sekvas virtualan voj-planon, kies halto-punktoj estas Esperanto-lokoj, konataj kaj malpli konataj centroj, kluboj, kelkfoje unuopaj homoj, kiuj gastigas tiun virtualan karavanon. Kiam la karavano atingas unu el la halto-punktoj, la gastigantoj prezentas al ili sian agadon per son- aŭ film-materialoj, kiuj publikiĝas en la momento, kiam la karavano atingis ilian urbon.

Sed kiel moviĝas la karavano? La vojplano estas virtuala, sed la paŝado estas reala. Post ĉiu sport-okazo la partoprenantoj registras en la paĝaro la faritajn kilometrojn aŭ la minutojn/horojn de sia sportumado. Ĉiu marŝas individue, sed la individuaj distancoj sumiĝas kaj antaŭenirigas la karavanon.

Por kuraĝigi la partoprenantojn, la redaktoro de tempo al tempo proponas premiojn. La premioj konsistas el son-materialoj aŭ muziko, kiujn ili povos aŭskulti dum la sportumado. Ekzemple, estas interesaj artikoloj pri la naturo kaj pri medioprotektado, kuracistaj konsiloj, intervjuoj kun sportumantaj esperantistoj, voĉ-legitaj literaturaĵoj, aŭ instruaj diskutoj pri gramatikaj temoj. La sondosieroj estas riceveblaj nur dum kelkaj tagoj, tial valoras ne maltrafi ilin.

Por partopreni la projekton ne necesas esti sportisto. Ĉiu, kiu pretas regule movi sin almenaŭ kelkajn kilometrojn aŭ horojn semajne jam estu kun ni. En la karavano estas bonvenaj ankaŭ handikapitaj samideanoj, kiujn ni kore invitas kunvojaĝi.

Per Kunpaŝado ni celas kunigi la lernadon kaj aplikadon de la lingvo, kunigi Esperanto-komunumon, krei mondmapon de Esperanto-lokoj, kaj instigi esperantistojn al pli sana vivmaniero. La projekto nun estas en prov-periodo, kiam ni ankoraŭ observas la kutimojn de la membroj de la karavano kaj serĉas la plej konvenan formon por la konstruo de la definitiva reta programo. Por krei la definitivan retejon ni bezonas programistojn kaj grafikiston.

Por krei retejon, kompreneble, necesas mono. Jam estas kolektitaj kelkaj miloj da eŭroj, per kiuj esperantistoj subtenis ĉiun kilometron de Katalin kaj aliaj kunpaŝantoj, kiam ili partoprenis la amasmarŝadon en 2019.

Se vi deziras kunpaŝi, aŭ helpi en konstruado de la programo, vi trovos informojn en la retpaĝo pri la projekto ĉe edukado.net. Spektu ankaŭ filmeton pri la projekto, en kiu Katalin mem prezentas ĝin dum kunveno en Poznań, Pollando, en septembro 2019.