Eblas aŭskulti ĉi tiun artikolon, kiun voĉlegis Derek Roff.
La kastelo Grezijono (Grésillon), konstruita en 1882, troviĝas en la okcidenta parto de Francujo inter Nanto kaj Parizo. Ĝia nomo en la mezepoka franca lingvo signifas grilo, aŭ loko en kiu kantas grilo.
La kastelo troviĝas tie!
En 1952, la kastelo estis aĉetita de esperantistoj por fari kursojn por instrui Esperanton. Ĝia oficiala nomo estas nun “Kulturdomo de Esperanto”.
Ĉe Grezijono estas dudek kvin dormoĉambroj kun ĉirkaŭ sesdek litoj en la ĉefa konstruaĵo kaj en la kromdomoj. Sur la apud-kastela herbejo oni povas tendumi.
La kulturdomo organizas Esperanto-programon ĉiu-jare. La programo daŭras unu aŭ plurajn semajnojn kaj normale enhavas Esperanto-kursojn kaj aliajn aktivaĵojn: prelegojn, spektaklojn, kulturon kaj arton, man-laborojn (ekz libro-bindadon), marŝadon, ktp.
Unu el la kursoj estas PRINTEMPaS, kiu okazas fine de aprilo ekde 2010. Tio estas intensa kurso de Esperanto (kvin horoj da instruado ĉiu-tage dum unu semajno) kun KER-ekzameno je la fino de la semajno. Estas tri niveloj: komencantoj, meza nivelo kaj progresantoj.
Dum la restado, oni ne nur studas, sed ankaŭ amuziĝas. Okazas diversaj agadoj posttagmeze, ekz. vizitoj al historia apoteko, al prahistoria dolmeno, al alia kastelo, krom biciklado kaj flugpilko, dum vespere estas muzikaj prezentoj kaj prelegoj.
En 2019, ĉirkaŭ tridek lernantoj de diversaj landoj partoprenis en PRINTEMPaS. Ili venis de Francujo kompreneble sed ankaŭ de Irlando, Britujo, Belgujo, Svislando kaj Rusujo.
Jam eblas aliĝi al la venonta sesio, kiu okazos de la 17-a ĝis la 25-a de aprilo 2020.
Anthony Bodineau
Redaktite de Anna
-
3
-
1
-
1
Anthony Bodineau estas franco, nun loĝanta en Londono. Li eklernis Esperanton antaŭ kvar jaroj, kaj nun mem instruas kurson por komencantoj.
- kastelo: granda loĝloko, defendebla kontraŭ atakoj per altaj muroj; granda konstruaĵo kie loĝas reĝo aŭ alia grava persono.
Foto: WyrdLight.com CC BY-SA 3.0
- grilo: insekto aktiva kutime nokte, kiu aŭdigas fortan bruon per siaj kruroj.
- tendumi: dum kelka tempo loĝi en sub-ĉiela loĝejo el ŝtofo.
- bindi: kunkudri la kajerojn de libro kaj surmeti sur ilin malmolan kovrilon.
Foto: Jean-Pol Grandmont CC BY 2.5
- apoteko: vendejo, kie oni vendas kuracilojn.
- dolmeno: grupo de ŝtonegoj el la prahistoria tempo, super loko, kie mortintoj estis enterigitaj.
Rekomendataj komentoj
Aliĝu al la diskutado!
Eblas afiŝi nun kaj registriĝi poste. Se vi jam havas konton, ensalutu nun por afiŝi uzante ĝin.