Eblas aŭskulti ĉi tiun artikolon, kiun voĉlegis Rafael Henrique Zerbetto.
Saluton! Jen facila novaĵo de El Popola Ĉinio por tiu ĉi semajno:
Malsanuleja roboto
En la 5-a de marto 2020, roboto komencis labori en la malsanulejo Leishenshan de la urbo Wuhan, en Ĉinio. La roboto povas libere turniĝi kaj moviĝi antaŭen aŭ malantaŭen, kaj memstare plenumas siajn farendaĵojn, kiel malinfektado kaj transportado de kuracaj materialoj. Ĝi faciligas la laboron de kuracistoj kaj flegistoj, kaj malaltigas la riskon de infektiĝo.
La roboto estas farita en la urbo Shenzhen, speciale por tiu malsanulejo. Ĝi povas funkciadi dum ok horoj post unufoja ŝargado. Portante malinfektan skatolon, la roboto povas malinfekti apartigitajn areojn per malinfektaĵ-ŝpruca tekniko, kaj povas ankaŭ memstare ĝustigi la ŝprucilon laŭ malsamaj cel-objektoj. La roboto ĉiutage malinfektas dufoje la malsanulejon, kaj kapablas malinfekti areon de 120 kvadrataj metroj en nur unu minuto, kio povas anstataŭi la laboron de kvar profesiaj malinfektistoj. Krome, la roboto ankaŭ estas "transportisto", kiu povas rapide transporti kuracilojn kaj aparatojn. Ĝi ankaŭ havas aliajn funkciojn, kiel voĉe anonci kaj memstare identigi homojn.
Tiu estis la elektita novaĵo de El Popola Ĉinio por tiu ĉi semajno. Por pliaj informoj kaj aliaj novaĵoj, vizitu nian retejon: www.espero.com.cn.
-
4
-
1
- areo: loko aŭ spaco kun difinitaj limoj kaj difinita uzo.
- flegi: prizorgi malsanulon aŭ malfortulon; ame prizorgi iun aŭ ion.
.jpg.8bf5194fe41c1b14a32148fc9759c918.jpg)
- identigi: malkovri aŭ ekscii, kiu estas iu aŭ io.
- infekti: transdoni malsanon.
- mem-stare: starante, agante, vivante per si mem, sen helpo de aliaj.
- plenumi: plene fari tion, kio necesas; efektivigi.
- risko: ebleco de danĝera situacio; ebleco de malgajno aŭ perdo.
- roboto: maŝino kapabla agi kvazaŭ ĝi estus homo aŭ besto, kaj plenumi ties funkciojn.
- ŝargi: meti elektron en aparaton, ekzemple en telefonon.
- ŝpruci: (pri akvo aŭ simile) rapide, salte kaj fortege elflui eksteren.
Rekomendataj komentoj
Aliĝu al la diskutado!
Eblas afiŝi nun kaj registriĝi poste. Se vi jam havas konton, ensalutu nun por afiŝi uzante ĝin.